Алматы қалалық перинаталдық орталығында аналар мен жаңа туған нәрестелерге көрсетілетін медициналық көмектің сапасын, тиімділігі мен қауіпсіздігін арттыру мақсатында Госпитальдық фармация бөлімі ашылды.
Жаңа бөлімшенің құрылуы медициналық көмекті ұйымдастыру жүйесін жетілдіру және пациенттердің дәрілік қауіпсіздігін қамтамасыз етудің заманауи тәсілдерін енгізу жолындағы маңызды қадам болып табылады.
Бүгінде фармакотерапияның қауіпсіздігі әлемдік денсаулық сақтау жүйесінің басым бағыттарының бірі саналады. Бұл мәселе әсіресе акушерлік және неонатологиялық көмек көрсетілетін ұйымдар үшін өзекті. Себебі мұнда медициналық көмек бір мезетте екі пациентке – ана мен балаға көрсетіледі.
Госпитальдық фармация бөлімінің негізгі мақсаты – дәрілік заттарды ұтымды пайдалану, медикаментоздық қателіктердің алдын алу және емдеу тиімділігін арттыру.
Бөлім мамандары тағайындалған дәрілік терапияны бағалауға қатысады, дәрілік заттардың өзара әрекеттесуін талдайды, дәрілік препараттарды қолдану стандарттарының сақталуын бақылайды және клиникалық фармакология мәселелері бойынша медицина қызметкерлеріне консультативтік көмек көрсетеді.
Жүкті әйелдерге, босанушыларға, босанған әйелдерге және жаңа туған нәрестелерге дәрілік заттарды қолдану қауіпсіздігіне ерекше назар аударылады. Сонымен қатар антибиотиктерге төзімділіктің алдын алу мақсатында бактерияға қарсы препараттарды ұтымды пайдалану мәселелері де бөлім қызметінің маңызды бағыттарының бірі болып табылады.
Бөлімнің жұмысы акушер-гинеколог дәрігерлермен, неонатологтармен, анестезиолог-реаниматологтармен, клиникалық фармакологтармен, фармацевтермен және орта буын медицина қызметкерлерімен тығыз өзара іс-қимыл негізінде жүзеге асырылады. Мұндай мультидисциплинарлық тәсіл ықтимал тәуекелдерді дер кезінде анықтауға, дәрілік қамтамасыз ету үдерістерін жетілдіруге және медициналық көмектің сапасын арттыруға мүмкіндік береді.
Мамандардың айтуынша, госпитальдық фармация қағидаттарын енгізу дәлелді медицинаға, жеке тәсілге және емдеу тиімділігін үздіксіз бақылауға негізделген дәрілік қауіпсіздік мәдениетін қалыптастыруға ықпал етеді.
Госпитальдық фармация бөлімінің ашылуы Қазақстан Республикасының денсаулық сақтау жүйесін дамыту жөніндегі стратегиялық міндеттерге сәйкес келеді және пациенттердің қауіпсіздігін арттыруға, медициналық қызметтердің сапасын жақсартуға, сондай-ақ халықаралық озық тәжірибелерді медициналық ұйым қызметіне енгізуге бағытталған.
Алматы қалалық перинаталдық орталығы аналар мен жаңа туған нәрестелердің денсаулығын сақтауға бағытталған заманауи технологиялар мен басқарушылық шешімдерді кезең-кезеңімен енгізуді жалғастырып, пациенттерге медициналық көмектің жоғары деңгейін қамтамасыз етуде.
